(مش) معاك كارت بلانش
بقلم د- إسراء اسامه الطماوي
- " مسعود أنا عايز فلوس " قالها الراحل (سمير غانم) وكلنا ضحكنا واحنا مش واخدين بالنا إن هي دي العقليه بتاعة الراجل بالفعل ... الراجل كائن بسيط وربنا مديله مقومات أولها الجرأة في ابداء الرغبات بياخد أقصر الطرق بطريقة " مسعود أنا عاوز فلوس"
لكن اوعا تفتكر إن الست تكوينها يشبه تكوينك وإنها ببساطه هتقولك بعشم ( مسعود أنا عاوز فلوس) ..لأ – وهنا المشكلة الأزلية بين الراجل والست
[ ما انت لو كنت بتهتم ] .... وتنتهي ب ( مخاصماك)
لأن الست أصلا ربنا خلقها مرغوبة لا راغبة و ده له تأثيرعلى طريقتها في التعامل الست تحب تحس إنك فاهمها وعارف احتياجها منك من غير ما تطلبه بشكل مباشر
[ الله بقا اللخبطة دي ليه ] ..
لأ مش لخبطة ولا حاجة.. بس الست لو طلبت الشيء بتحس إن في شيء اتكسر جواها لأن زي ما قولنا هي مرغوبة لا راغبة هي تحب أنت اللي تعبر لها عن اهتمامك وتلبي احتياجاتها خصوصا لو كانت احتياجات بديهية ومعروفه .
هي اه ممكن تلمح ... والحدق يفهم
ممكن تلعب معاك لعبة انت (مش) معاك كارت بلانش
خد عندك.. عندكم مشوار سوا هي هتقولك : لو عندك شغل أو مش قادر تيجي متجيش.
فأنت (ببراءة الاطفال في عينيك) وبسبب برمجتك اللغوية السابقه إن الكلام المباشر يعبر عن رغبات أو حقائق هتقولها ماشي يا حبيبتي وتسيبها تروح لوحدها.
هنا لقد وقعنا في الفخ...
لأن انت (مش ) معاك كارت بلانش بقبول العرض ده
هي منتظره منك بكل حب تقولها لأ طبعا هاجي معاكي ماسبكيش لوحدك ♥♥
والكلام ده ينطبق على الانثى في حياتك بكل علاقة تربطك بيها أم زوجة ابنه اخت..
ولما تفهم التريكا النفسية دي هتتفادى تراكمات كتير بتحصل جوا عقل وقلب الست.
كل ما هتحسس الست بالتدليل وإنها في اولوياتك حتى لو هي عرضت عليك العكس واظهرت تقدير لانشغالك كل ما هتشيلك فوق راسها.
احنا بندي وقت في حياتنا لاصحابنا والتليفون والماتشات
ميجراش حاجه لو فكرنا نبذل شوية وقت وجهد بحب عشان نحافظ على علاقاتنا
وتلاقي في بيتك اجمل هانم وليدي بتحبك وتموت فيك.
واوعا تقع في فخ (معاك كارت بلانش).
تعليقات
إرسال تعليق